Meta ka lidhur një marrëveshje me Midjourney për të licencuar teknologjinë e kësaj kompanie startup në gjenerimin e imazheve dhe videove me inteligjencë artificiale. Lajmi u bë i ditur nga Alexandr Wang, Shefi i AI në Meta, përmes një postimi në Threads të premten. Wang tha se ekipet kërkimore të Metës do të bashkëpunojnë me Midjourney për ta integruar teknologjinë e saj në modelet dhe produktet e ardhshme të kompanisë.
“Që Meta të mund të ofrojë produktet më të mira të mundshme për njerëzit, kjo kërkon një qasje gjithëpërfshirëse,” tha Wang. “Kjo nënkupton talent botëror, një strategji të fuqishme kompjuterike dhe bashkëpunim me lojtarët më të fortë të industrisë.”
Partneriteti me Midjourney mund t’i ndihmojë Metës të zhvillojë produkte që rivalizojnë me modelet kryesore të gjenerimit të imazheve dhe videove, si Sora e OpenAI, Flux i Black Forest Lab dhe Veo i Google. Vitin e kaluar, Meta prezantoi mjetin e saj të gjenerimit të imazheve, Imagine, në disa prej platformave të saj si Facebook, Instagram dhe Messenger. Kompania ka gjithashtu edhe një mjet gjenerimi videosh, Movie Gen, që u mundëson përdoruesve të krijojnë video nga përshkrime tekstuale.
Marrëveshja e licencimit me Midjourney është lëvizja më e fundit e Metës për të qëndruar në garën e AI. Më herët këtë vit, CEO Mark Zuckerberg nisi një fushatë të madhe rekrutimi në fushën e AI-së, duke ofruar pako kompensimi mbi 100 milionë dollarë për disa studiues. Po ashtu, Meta investoi 14 miliardë dollarë në Scale AI dhe bleu startup-in e zërit me AI, Play AI.
Meta ka zhvilluar bisedime edhe me disa laboratorë të tjerë të AI-së për blerje të mundshme, ndërsa Zuckerberg madje ka biseduar me Elon Musk për t’iu bashkuar ofertës së tij prej 97 miliardë dollarësh për blerjen e OpenAI. Megjithatë, Meta nuk iu bashkua ofertës dhe OpenAI e refuzoi atë.
Kushtet e marrëveshjes me Midjourney nuk janë bërë të ditura, por CEO i startup-it, David Holz, tha përmes një postimi në X se kompania mbetet e pavarur dhe pa investitorë. Midjourney është një nga të paktët zhvillues të mëdhenj të modeleve AI që nuk ka marrë financim të jashtëm. Sipas mediave, në një moment Meta madje diskutoi për blerjen e Midjourney.
Midjourney u themelua në vitin 2022 dhe shumë shpejt u bë lider në gjenerimin e imazheve me AI falë stilit të saj realist e unik. Deri në vitin 2023, startup-i raportoi të ardhura deri në 200 milionë dollarë. Kompania ofron abonime që fillojnë nga 10 dollarë në muaj dhe arrijnë deri në 120 dollarë për paketat më të shtrenjta që ofrojnë më shumë gjenerime imazhesh. Në qershor, Midjourney prezantoi modelin e saj të parë të videove me AI, V1.
Ky partneritet i Metës me Midjourney vjen vetëm dy muaj pasi startup-i u padit nga Disney dhe Universal, të cilët e akuzuan se kishte trajnuar modelet e AI me vepra të mbrojtura nga e drejta e autorit. Shumë kompani të tjera të ngjashme — përfshirë edhe Metën — përballen me akuza të ngjashme, megjithatë, disa gjykata së fundmi kanë marrë vendime në favor të kompanive të teknologjisë për përdorimin e të dhënave në trajnimin e AI.
