Dorëheqja e Liburn Aliut nga posti i ministrit në detyrë të Infrastrukturës ka shkaktuar reagime të shumta në skenën politike të vendit.
Aliu ishte njëri nga figurat themeluese të Lëvizjes Vetëvendosje, që mbeti aktiv në parti deri në momentin e largimit të tij nga qeveria.
Ai, së bashku me Albin Kurtin dhe Glauk Konjufcën, kishte nisur angazhimin politik në organizatën KAN, e cila më pas u shndërrua në Vetëvendosje.
Në një rrëfim të mëhershëm në emisionin DPT në T7, Aliu kishte kujtuar fillimet e idesë së vetëvendosjes.
“Nga viti 2002 ka qenë ideja e konceptit të vetëvendosjes. Kur u pata arrestuar në vitin 1997, para gjykatësit serb thashë se dua vetëvendosje për popullin tim. Kjo ide ishte themeli politik, pasi që na imponohej ajo e ‘standardeve’: plotësoni standardet që të mund të uleni në tavolinë me Serbinë, e pastaj të flitej për statusin, pa na pyetur ne a dëshirojmë pavarësi, bashkim me Shqipërinë apo diçka tjetër”, kishte deklaruar ai.
Aliu kishte treguar edhe për sakrificat personale të bëra gjatë viteve të para të organizatës, kur mungonin burimet financiare dhe aktivitetet zhvilloheshin me mjete të kufizuara.
“Shumica prej nesh i lanë edhe punët e tyre për t’u marrë me organizatën. Nuk kishim donacione, ishim të limituar, kujtoj se na ndihmonin edhe të blinim sprejin. Unë kisha fatin se gruaja punonte, dhe i tregova asaj se doja të angazhohesha intensivisht me organizatën. Fatmirësisht, ajo u pajtua me mua”, ka rrëfyer Aliu.
Dorëheqja e tij, pas zgjedhjes së kryetarit të Kuvendit, shihet si një prej zhvillimeve më të mëdha politike brenda Lëvizjes Vetëvendosje.
