Një studim i ri sugjeron se konsumimi i frutave dhe perimeve mund të ndihmojë në përmirësimin e mirëqenies mendore, edhe pas një nate me gjumë të dobët.
Gjetjet, të publikuara në revistën PLOS One, tregojnë se të rinjtë që flenë më mirë dhe konsumojnë më shumë fruta e perime raportojnë nivele më të larta të mirëqenies psikologjike.
Studimi përfshiu të rinj nga Zelandë e Re, Mbretëria e Bashkuar dhe Shtetet e Bashkuara, duke analizuar gjurmimet ditore të gjumit, aktivitetit fizik dhe dietës, shkruan MedicalXpress transmeton Qendra.info.
Sipas autorëve, përfitimet e gjumit dhe të ushqyerit shëndetshëm janë të pavarura dhe mund të shtohen: sa më shumë nga këto sjellje të shëndetshme të praktikohen, aq më i madh është ndikimi pozitiv në mirëqenie.
“Një gjumë më i mirë është faktori më i fuqishëm për mirëqenien e ditës së nesërme, por konsumimi i frutave dhe perimeve, si dhe aktiviteti fizik, gjithashtu japin ndikim pozitiv,” thotë Prof. Tamlin Conner nga Universiteti i Otagos.
Studimi sugjeron se të rinjtë nuk kanë nevojë të arrijnë standarde ekstreme shëndetësore për të ndjerë përmirësim: edhe ndryshime të vogla në gjumë, dietë ose aktivitet fizik mund të rrisin ndjeshëm mirëqenien ditore.
