Një pilot i Forcave Ajrore Kroate, me inicialet J.I. (54), dhe partnerja e tij A.M. (46), janë arrestuar dhe ndodhen në paraburgim, pasi dyshohen për spiunazh dhe për lidhje me një nga sulmuesit e përfshirë në rastin e Banjskës.
Zyra e Prokurorit të Shtetit të Qarkut të Splitit ka konfirmuar se është hapur hetim ndaj tyre, duke i akuzuar për zbulim dhe transmetim të të dhënave sekrete. Sipas prokurorisë, piloti përballet me deri në 10 vjet burg, ndërsa partnerja e tij rrezikon nga 1 deri në 5 vjet burgim.
Hetuesit dyshojnë se J.I. i ka përcjellë A.M.-së të dhëna konfidenciale mbi lëvizjet dhe pozicionet e trupave të KFOR-it, të cilat ajo i ka transmetuar më pas përmes aplikacioneve të koduara. Ndërkohë, piloti ka mohuar akuzat, duke deklaruar se kishte ndarë vetëm të dhëna të motit për fluturimet e tij, por prokuroria pretendon se informacionet kanë qenë shumë më të ndjeshme.
Çifti është njohur në vitin 2016 në Kosovë, ku piloti shërbente në kontingjentin kroat të KFOR-it, ndërsa A.M. punonte si përkthyese në EULEX. Marrëdhënia e tyre, me ndërprerje, ka zgjatur për nëntë vjet. Arrestimi i A.M. është kryer në ishullin Vis të Kroacisë, ku ajo gjendej gjatë vizitave të saj të shpeshta.
Gjykata ka urdhëruar që të dy të qëndrojnë në paraburgim, duke e konsideruar A.M. si rrezik arratisjeje, ndërsa për pilotin është vlerësuar se nuk mund të përsëritë veprën pasi nuk është më i angazhuar në misionin në Kosovë. Hetimet do të vazhdojnë për të zbuluar nëse informacionet e transmetuara kanë pasur ndikim të drejtpërdrejtë në rastin e Banjskës.
