Oficerë ushtarakë amerikanë u panë duke i vëzhguar ushtrimet e përbashkëta ushtarake mes Rusisë e Bjellorusisë të hënën.
Ministri i Mbrojtjes i Bjellorusisë, Viktor Khrenin, iu tha oficerëve amerikanë se mund të shikojnë “çfarëdo që u intereson”, raporton agjencia e lajmeve “Reuters”.
Rusia dhe Bjellorusia e filluan ushtrimin ushtarak “Zapad-2025” në territoret e të dyja vendeve të premten, në kohën e tensioneve të ngritura me NATO-n, dy ditë pasi Polonia rrëzoi disa dronë rusë që kishin hyrë në hapësirën e saj ajrore.
Pjesëmarrja e amerikanëve në zonën e ushtrimeve ushtarake në Bjellorusi u prezantua si befasi nga Ministria e Mbrojtjes e Bjellorusisë.
“Kush do të kishte menduar se si do të niste mëngjesi i një dite ttjetër të ushtrimit Zapad-2025” – thuhet në një deklaratë të kësaj ministrie, ku theksohet pjesëmarrja e oficerëve amerikanë në mesin e përfaqësuesve nga 23 shtete, përfshirë dy vende të tjera anëtare të NATO-s, Turqinë dhe Hungarinë.
Ministria e Mbrojtjes publikoi një video ku dy oficerët ushtarakë amerikanë e falënderojnë ministrin Khrenin për ftesën dhe duke i shtrënguar duart me të.
“Ne do të tregojmë çfarëdo që ju intereson. Çfarëdo që dëshironi. Mund të shkoni atje dhe të shihni, të flisni me njerëz” – iu tha ministri bjellorus amerikanëve, të cilët refuzuan që të flisnin me gazetarë.
Prania e oficerëve amerikanë është shenja më e re e ngrohjes së marrëdhënieve mes Shteteve të Bashkuara e Bjellorusisë, aleate e ngushtë e Rusisë, që e lejoi Putinin ta përdorte territorin e saj për të dërguar dhjetëra mijëra ushtarë në Ukrainë në shkurtin e vitit 2022./Nacionale/Nasuf Abdyli
