Amina Nuraj, drejtuese e Zyrës së Këshillit Kombëtar Shqiptar në Pazar të Ri (Novi Pazar) dhe aktiviste për të drejtat e shqiptarëve në Sanxhak, ka reaguar me një postim të fuqishëm në rrjetet sociale pas fjalimit të Presidentit të Shqipërisë, Bajram Begaj, në Asamblenë e Përgjithshme të Kombeve të Bashkuara.
Në reagimin e saj, Nuraj shpreh zhgënjimin që politikanët shqiptarë në Ballkan shpesh përmendin shqiptarët e Luginës së Preshevës, por harrojnë shqiptarët e Sanxhakut, duke e cilësuar këtë një padrejtësi të vazhdueshme. Ajo thekson:
“Nuk më shqetëson që serbët më mbajnë në kufij për disa orë, aq më krenar ndihem për këtë. E vetmja gjë që më shqetëson është indiferenca e politikanëve shqiptarë ndaj shqiptarëve të Sanxhakut.”
Postimi i saj ka ngritur edhe një kontradiktë të hapur me kryetarin e Këshillit Kombëtar Shqiptar, Enkel Rexhepi, i cili shpesh ka qënë objekt kritikash për qëndrime që Nuraj i konsideron kontradiktore ndaj interesave të komunitetit shqiptar në Sanxhak.
Nuraj i bën thirrje politikanëve shqiptarë në Ballkan që të mos e përdorin çështjen kombëtare për përfitime politike, por të ndërmarrin veprime konkrete për mbrojtjen e shqiptarëve në Sanxhak. Ajo shton:
“Ne kemi një zemër më të madhe dhe një patriotizëm më të madh se të gjithë politikanët që i harrojnë. Jemi ata që jetojmë dhe vdesim për flamurin dhe kombin.”
Ky reagim vjen menjëherë pas fjalimit të Presidentit Begaj në OKB, ku ai përmendi rëndësinë e respektimit të të drejtave të shqiptarëve në Luginën e Preshevës dhe kërkoi anëtarësimin e Kosovës në Asamblenë e Kombeve të Bashkuara — një fjalim që, sipas Nurajt, injoroi plotësisht çështjen e shqiptarëve të Sanxhakut.
Ajo përfundon me një mesazh të fuqishëm:
“Me ju pa juve, politikanë të nderuar të kombit shqiptar në Ballkan, unë jam përsëri Amina, jam gruaja që jeton dhe që është gati të japë jetën për flamurin dhe atdheun.”
Ky reagim ka shkaktuar debat të madh në rrjetet sociale, duke rikthyer në qendër të vëmendjes situatën e shqiptarëve në Sanxhak dhe marrëdhëniet brenda Këshillit Kombëtar Shqiptar.
