Gjykata e Helsinkit ka dënuar ish-futbollistin e njohur të Veikkausliigas, Albert Kuqi, me tetë vite burg për tre vepra penale të rënda që lidhen me trafik droge, raporton Periskopi.
Sipas aktgjykimit, Kuqi, së bashku me dy persona të tjerë, sollën në Finlandë rreth 14 kilogramë kokainë gjatë viteve 2024–2025, prej të cilave 9.5 kilogramë përfunduan në treg për shpërndarje. Kuqi u përfshi në sigurimin e apartamenteve për grupin kriminal në zona të ndryshme të Helsinkit, si dhe në gjetjen e klientëve dhe mbledhjen e parave nga tregtia e drogës. Gjykata theksoi se roli i tij ishte më i vogël krahasuar me bashkëautorët.
Lulzim Gerxhaliu (34) dhe Ergi Tusha (34), të përfshirë pjesërisht nga jashtë Finlandës në organizimin e trafikut, u dënuan me nga 10 vite e 2 muaj burg secili.
Prokuroria kishte kërkuar dënime më të ashpra, duke argumentuar se bëhej fjalë për një grup të strukturuar kriminal, por gjykata vlerësoi se niveli i organizimit ishte i ulët. Falë bashkëpunimit gjatë hetimit paraprak, të dënuarve iu ulën dënimet — Kuqi do të përballej me mbi 10 vite burg pa këtë ulje, ndërsa Gerxhaliu dhe Tusha me mbi 11 vite.
Gjykata urdhëroi gjithashtu konfiskimin e 357 mijë eurove përfitime nga krimi. Në proces u sekuestruan mbi 30 kilogramë marijuanë, e cila nuk kishte lidhje të drejtpërdrejtë me trafikun e kokainës.
Në total, 13 persona u përfshinë në këtë proces gjyqësor: tre u shpallën të pafajshëm, shtatë morën dënime me burg prej të paktën dy vitesh dhe tre morën dënime me kusht.
Albert Kuqi kishte luajtur për disa skuadra finlandeze në vitet 2010–2018, para se ta përfundonte karrierën e tij futbollistike.
