Buenos Aires – Një ngjarje makabre ka tronditur Argjentinën dhe opinionin publik ndërkombëtar, pasi tre vajza të reja u rrëmbyen, iu nënshtruan torturave të rënda dhe u vranë në mënyrë brutale nga një grup kriminal i trafikut të drogës. Një pjesë e krimit të tyre u transmetua drejtpërdrejt në TikTok.
Viktimat janë identifikuar si:
-
Lara Gutierrez, 15 vjeç, më e reja ndër to.
-
Brenda del Castillo, 20 vjeç.
-
Morena Verdi, 21 vjeç.
Autoritetet argumentojnë se ngjarja ishte një “akt hakmarrjeje” i mirëplanifikuar nga një bandë narkotrafikantësh, që i mashtroi vajzat duke i ftuar në një “event” për t’i çuar më pas drejt ekzekutimit me metoda çnjerëzore.
Sipas hetimeve, dy prej viktimave dyshohen se ishin akuzuar për vjedhjen e katër kilogramëve kokainë nga grupi kriminal, çka besohet se shkaktoi hakmarrjen.
Detaje tronditëse nga vendi i krimit:
-
Lara Gutierrez humbi të gjithë gishtat e dorës së majtë para ekzekutimit.
-
Brenda del Castillo kishte plagë të rënda në kokë dhe bark.
-
Morena Verdi ishte asfiksuar me një qese plastike.
Trupat e tyre u gjetën të groposur në një kopsht pesë ditë pas zhdukjes. Hetimet zbuluan se vendi i krimit ishte një shtëpi që përdorej si bazë operacionale nga banda.
Ministri i Sigurisë së Buenos Aires, Javier Alonso, deklaroi:
“Vajzat u panë për herë të fundit duke hipur në një automjet me dëshirë, duke menduar se po shkonin në një event. Në fakt, ato ranë në kurthin e një bande ndërkombëtare të trafikut të drogës, e cila kishte planifikuar me detaje eliminimin e tyre.”
Autoritetet argjentinase bëjnë me dije se udhëheqësi i bandës është shtetas peruan dhe dyshohet të ketë braktisur vendin. Katër persona janë arrestuar deri tani në lidhje me këtë krim të rëndë.
Ngjarja ka shkaktuar indinjatë dhe protesta në mbarë Argjentinën dhe ka nxitur një hetim ndërkombëtar për të zbuluar dhe ndaluar të gjithë personat e përfshirë në rrjetin kriminal./The Sun/Qendra.INFO
