Deputetët e Kuvendit të Kosovës vazhdojnë të marrin paga bazë edhe gjatë periudhës së masës së përkohshme të vendosur nga Gjykata Kushtetuese, edhe pse aktivitetet parlamentare janë pezulluar. Sot, më 30 shtator, secili prej tyre merr pagën bazë prej 1,914 euro, duke bërë që paga mujore vetëm për 105 deputetë (pa përfshirë 15 anëtarë të Qeverisë) të arrijë 200,970 euro nga buxheti i Kosovës.
Masa e përkohshme, e cila ka hyrë në fuqi më 5 shtator, ka ndaluar çdo veprim të deputetëve për formimin e Qeverisë së re dhe çdo procedurë tjetër parlamentare, për shkak të një ankese të Listës Serbe ndaj procesit të konstituimit të Kuvendit. Masa përfundon sot, 30 shtator.
Gjatë kësaj periudhe, deputetët nuk kanë zhvilluar aktivitete të zakonshme parlamentare, përveç disa takimeve nga kryetari i zgjedhur i Kuvendit, Dimal Basha. Megjithatë, paga vazhdon të paguhet, përveçse shtesave për përvojë dhe poste të tjera që mund të kenë disa deputetë.
Kryeministri në detyrë, Albin Kurti, ka kritikuar vendimin e Gjykatës Kushtetuese, duke e cilësuar si një ndërhyrje politike në favor të opozitës dhe duke deklaruar se kjo vonesë ka penguar formimin e institucioneve të reja për më shumë se gjashtë muaj. Ndërkohë, Lista Serbe ka kërkuar që Gjykata Kushtetuese të vendosë masë të përkohshme për të ndaluar proceset për formimin e qeverisë, duke argumentuar se mosmarrja e saj do të sillte dëme të pariparueshme për rendin demokratik.
Për shkak të mosmarrëveshjeve mbi zgjedhjen e nënkryetarit të Kuvendit nga komuniteti serb, procesi i konstituimit ka ngecur prej muajsh, duke lënë Kosovën pa institucione të reja që nga zgjedhjet e 9 shkurtit 2025.
