Shefi i Pentagonit, Pete Hegseth, ka paralajmëruar reforma të thella në ushtrinë amerikane, duke e cilësuar periudhën e deritashme si “dekada të kalbjes”.
Në një takim të rrallë me dhjetëra gjeneralë dhe admiralë nga të gjitha bazat ushtarake amerikane në botë, mbajtur në Virxhinia, Hegseth ka shpallur fundin e asaj që i quajti “mbeturina ideologjike”.
Sipas tij, ushtria nuk do të përqendrohet më në çështje si ndryshimet klimatike, ngacmimet, lidershipi “toksik” dhe promovimet e bazuara në gjini apo racë.
“Ushtria është detyruar nga politikanë të pamatur që të përqendrohet në gjërat e gabuara. Por, jo më”, ka deklaruar Hegseth.
Deklaratat e tij kanë ngjallur vëmendje të madhe, pasi përbëjnë sinjalin më të qartë të ndryshimeve që pritet të ndodhin në strukturën dhe qasjen e forcave të armatosura të SHBA-së.
