Një aksident i rëndë ka ndodhur paraditen e së enjtes në kantierin e ndërtimit të kompleksit “Royal Green Residence” në Zllatar të Prishtinës, ku një punëtor ka rënë nga lartësia gjatë kryerjes së punimeve.
Ngjarja ka ndodhur rreth orës 11:15, ndërsa punëtori i lënduar është dërguar menjëherë në QKUK. Sipas burimeve mjekësore, ai ndodhet në gjendje të rëndë shëndetësore.
Në vendin e ngjarjes kanë ndërhyrë njësitë policore dhe hetuesit, të cilët kanë nisur procedurat e nevojshme. Si dëshmitar është intervistuar D. M., ndërsa viktima për shkak të gjendjes së tij nuk ka mundur të jep deklaratë.
Po ashtu, është marrë në pyetje pronari i kompanisë “Fjordi SHPK”, Faton Krasniqi, në prani të avokatit mbrojtës. Pas intervistimit, me urdhër të prokurorit kujdestar, ai është ndaluar për 48 orë dhe është dërguar në qendrën e ndalimit.
Rasti është cilësuar si “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës” dhe pritet të hetohet me prioritet nga organet kompetente.
