Prishtinë, 3 tetor 2025 – Prokuroria Speciale ka refuzuar kallëzimin penal të ish-kryetares së Alternativës, Mimoza Kusari-Lilës, kundër gazetarit Vehbi Kajtazi, pronar i portalit Paparaci.com, për publikimin e një incizimi telefonik me Millan Radoiçiqin.
Në aktvendimin e nxjerrë javën e kaluar, Prokuroria ka konstatuar se audio-incizimi është autentik dhe nuk përmban elemente të veprës penale “nxitje të përçarjes dhe mosdurimit”. Vendimi u mor pas shqyrtimit të dëshmisë së Kusari-Lilës, dëgjimit të incizimit dhe analizës së provave materiale.
Kusari-Lila kishte ngritur kallëzim në tetor 2024, duke pretenduar se biseda ishte e fabrikuar dhe përbënte nxitje për përçarje. Incizimi në fjalë është realizuar në qershor të vitit 2022 dhe ka të bëjë me diskutime për çështje legjislative, përfshirë Projektligjin për Pagën Minimale dhe votimin për një gjyqtar të Gjykatës Kushtetuese.
Kusari-Lila ka insistuar se kishte biseduar vetëm një herë me Radoiçiqin dhe në gjuhën shqipe, duke e cilësuar publikimin si “montazh”.
Radoiçiq është në arrati që nga janari 2019 dhe i sanksionuar nga SHBA në dhjetor 2021, për shkak të akuzave për sulm terrorist në fshatin Banjska, Zveçan, dhe veprime kundër rendit kushtetues të Kosovës.
Me këtë vendim, Prokuroria Speciale konfirmon autenticitetin e incizimit dhe hedh poshtë kërkesën për ndjekje penale ndaj gazetarit, duke theksuar mungesën e elementeve për vepër penale.
