3 Tetor 2025
Qytetarët e Maqedonisë së Veriut shumë shpejt mund të kenë mundësinë të udhëtojnë drejt Shteteve të Bashkuara të Amerikës vetëm me pasaportë, pa pasur nevojë për vizë.
Kjo njoftohet nga Radio Evropa e Lirë, sipas të cilit çështja është në fokus të dialogut diplomatik mes Shkupit dhe Uashingtonit. Heqja e vizave konsiderohet një nga përfitimet më të rëndësishme të Dialogut Strategjik, një proces bashkëpunimi mes dy vendeve që nisi në qershor të vitit 2022.
Ky dialog shihet si një kornizë institucionale që synon të avancojë marrëdhëniet dypalëshe dhe të ofrojë masa konkrete për bashkëpunim në fusha të ndryshme, duke përfshirë ekonominë, sigurinë, teknologjinë dhe edukimin.
Procesi drejt heqjes së vizave
Ministria e Jashtme e Maqedonisë së Veriut ka konfirmuar për Radio Evropa e Lirë se vendi është pjesë e grupeve ndërsektoriale të punës që angazhohen në procesin e aderimit në Programin për Heqjen e Vizave dhe Programin Global për Hyrje në SHBA. Ky proces kërkon përmbushje të kritereve të ndryshme ligjore, teknike dhe sigurie, përfshirë standarde të larta për dokumentacionin e udhëtimit, kontrollin kufitar dhe bashkëpunimin në fushën e sigurisë.
Një hap historik për Maqedoninë e Veriut
Nëse ky proces përmbyllet me sukses, Maqedonia e Veriut do të bashkohet me një grup të vogël vendeve europiane që kanë privilegjin e udhëtimit drejt SHBA pa vizë. Aktualisht, këtë mundësi e kanë vende si Kroacia, Gjermania, Britania e Madhe, Zvicra dhe Holanda.
Ky zhvillim konsiderohet një arritje e madhe diplomatike për Shkupin dhe një hap i rëndësishëm në forcimin e marrëdhënieve me Shtetet e Bashkuara, si dhe një mundësi për përmirësimin e lidhjeve ekonomike dhe kulturore midis dy vendeve.
Analistët vlerësojnë se heqja e vizave do të ketë një ndikim pozitiv jo vetëm në mobilitetin qytetar, por edhe në promovimin e turizmit, shkëmbimeve arsimore dhe investimeve amerikane në Maqedoninë e Veriut. /Qendra.INFO
