4 tetor 2025 – Kryetari i Partisë së Lirisë dhe Drejtësisë (PLD), Dragan Gjilasi, e ka quajtur të turpshme deklaratën e Partisë Socialiste të Serbisë (PSS), e cila e përshkroi ish-presidentin Slobodan Millosheviç si “viktimën e parë të revolucioneve me ngjyra në botë”.
Në një reagim me shkrim, Gjilasi tha se kjo deklaratë është “fyerje ndaj qytetarëve të Serbisë dhe veçanërisht ndaj viktimave të regjimit kriminal të Millosheviçit, që e plaçkiti dhe e shkatërroi vendin, duke e lënë jashtë Evropës dhe civilizimit modern.”
“Sot në pushtet janë të njëjtët njerëz ose pasardhësit e tyre. Dallimi është vetëm në role: atëherë sundonte Millosheviçi dhe Vojisllav Shesheli ishte shërbëtori i tij, ndërsa sot Aleksandar Vuçiçi është udhëheqësi i një organizate kriminale dhe Ivica Daçiçi është shërbëtori i tij besnik,” – thuhet në reagimin e Gjilasit, të shpërndarë nga PLD-ja.
Ai shtoi se qytetarët, ashtu siç e rrëzuan me zgjedhje regjimin Millosheviç–Sheshelj, së shpejti do të rrëzojnë edhe pasuesit e tyre politikë, Vuçiçin dhe Daçiçin, të cilëve, sipas tij, “nuk do t’u lejohet më të kthehen në pushtet për të vjedhur dhe shkatërruar Serbinë.”
Partia Socialiste e Serbisë publikoi deklaratën e saj një ditë më parë, me rastin e 25-vjetorit të ngjarjeve të 5 tetorit 2000, duke theksuar se “Millosheviçi ishte viktima e parë e revolucioneve me ngjyra dhe imperializmit global”. Në të njëjtën deklaratë, PSS-ja bëri thirrje për forcimin e koalicionit me Partinë Përparimtare Serbe (PPS) dhe me presidentin Aleksandar Vuçiç./Qendra.INFO
