Kryebashkiaku në detyrë i Nju Jorkut, Eric Adams, ka mbërritur në Shqipëri për një vizitë zyrtare katërditore, gjatë së cilës pritet të zhvillojë takime me kryeministrin Edi Rama, përfaqësues të qeverisë, si dhe drejtues të sektorëve të biznesit dhe teknologjisë.
Vizitën e Adams në Shqipëri e ka konfirmuar zëdhënësja e tij, Kayla Mamelak, përmes një deklarate zyrtare.
“Gjatë ditëve të ardhshme, Kryetari i Bashkisë Adams do të udhëtojë për në Shqipëri, ku do të takohet me kryeministrin, udhëheqësit e biznesit dhe teknologjisë, do të vizitojë fabrikat dhe do të diskutojë mundësi të reja për të rritur aktivitetin ekonomik dhe turizmin në New York City,” tha Mamelak.
Sipas saj, qëllimi i kësaj vizite lidhet me forcimin e marrëdhënieve ekonomike dhe promovimin e turizmit ndërmjet Nju Jorkut dhe Shqipërisë.
Eric Adams, i cili ndodhet në fundin e mandatit të tij si kryebashkiak i Nju Jorkut, disa javë më parë njoftoi se nuk do të rikandidojë për një mandat të dytë në krye të bashkisë më të madhe të SHBA-së.
Vizita e tij në Tiranë pritet të përfshijë takime edhe me përfaqësues të diasporës shqiptaro-amerikane dhe me sipërmarrës lokalë, që synojnë zgjerimin e bashkëpunimit me tregun amerikan.
/Redaksia – Qendra.Info/
