Në Pallatin e Kongreseve u mbajtën sot homazhe në nder të gjyqtarit Astrit Kalaja, i cili u vra dy ditë më parë në ambientet e Gjykatës së Apelit.
Ceremonia mortore u zhvillua në prani të përfaqësuesve të lartë të institucioneve shtetërore dhe të sistemit të drejtësisë. Mes tyre ishte edhe kryeministri Edi Rama, i shoqëruar nga ministri i Drejtësisë, si dhe kolegë të gjyqtarit të ndjerë, prokurorë e gjyqtarë të tjerë.
Në librin e ngushëllimeve, kryeministri Rama shkroi:
“Një tragjedi e madhe për familjen, të afërmit, kolegët dhe vetë shtetin.
U prehtë në paqe, të rroni e ta kujtoni gjithnjë.”
Ngjarja e rëndë ndodhi dy ditë më parë, kur Elvis Shkambi, 31 vjeç, qëlloi me armë zjarri gjyqtarin Kalaja menjëherë pas shpalljes së vendimit në disfavor të tij në një çështje pronësie, duke i shkaktuar vdekjen e menjëhershme.
Autori qëlloi gjithashtu ndaj dy personave të tjerë të pranishëm në sallën e gjyqit, me të cilët kishte konflikte pronësie, duke i plagosur ata.
Pas arrestimit të Elvis Shkambit, në pranga për këtë ngjarje u vunë edhe xhaxhai i tij, Gjon Shkambi, si dhe punonjësi i sigurisë së Gjykatës së Apelit Tiranë, Banush Koxhaj, për dyshime në lidhje me neglizhencën në masat e sigurisë.
Euronews.al / Periskopi
