Vërmicë – Gjatë kontrolleve rutinore në Pikëkalimin Kufitar në Vërmicë, zyrtarët doganorë kanë zbuluar dy raste të kundërvajtjeve doganore, duke konfiskuar mallra të padeklaruara.
Sipas Doganës së Kosovës, dy automjete u selektuan për kontroll të detajuar në vijën e dytë, ku gjatë inspektimit u gjetën artikuj të ndryshëm për të cilët shoferët kishin mohuar posedimin. Mallrat e sekuestruara përfshinin: pjesë të përdorura për automjete, drita të përparme, parfum, çantë dore, si dhe një pako me këpucë të llojeve të ndryshme, mall stoku.
“Në shumicën e rasteve nuk ishte paraqitur faturë apo dokument përcjellës për mallrat e gjetura. Përveç çantës së dorës, të gjitha mallrat janë ndaluar përkohësisht deri në përfundimin e procedurave të mëtejshme”, thuhet në njoftimin e Doganës.
Ndaj shoferëve janë iniciuar procedura për kundërvajtje doganore, në përputhje me ligjin në fuqi.
Ky rast vë në pah rëndësinë e kontrolleve doganore për parandalimin e kontrabandës dhe ruajtjen e sigurisë tregtare.
