Politikania dhe liderja opozitare venezueliane Maria Corina Machado është shpallur fituesja e Çmimit Nobel për Paqe

10 tetor 2025 – Politikania dhe liderja opozitare venezueliane Maria Corina Machado është shpallur fituesja e Çmimit Nobel për Paqe për vitin 2025, në shenjë vlerësimi për angazhimin e saj të palëkundur në promovimin e të drejtave demokratike të popullit të Venezuelës.

Kryetari i Komitetit Norvegjez të Nobelit, Jorgen Watne Frydnes, e përshkroi Machadon si një “kampione të guximshme dhe të përkushtuar të paqes”, e cila “mban flakën e demokracisë ndezur në një periudhë errësire në rritje”.

Në deklaratën zyrtare të komitetit thuhet se Machado nderohet për sakrificat dhe përpjekjet e saj për të arritur një tranzicion të drejtë dhe paqësor nga diktatura në demokraci në Venezuelë.

Machado, e cila është një nga figurat më të rëndësishme të opozitës në vend, vazhdon të qëndrojë fshehur pas zgjedhjeve të vitit të kaluar, të cilat u kritikuan gjerësisht si të manipuluara nga regjimi i presidentit Nicolas Maduro.

Ky çmim shihet si një mesazh i fuqishëm ndërkombëtar në mbështetje të lirisë, demokracisë dhe të drejtave të njeriut në Venezuelë.