12 tetor 2025 – Fatmir Sheholli, i arrestuar nën dyshimet për spiunazh, është hospitalizuar në Spitalin Rajonal të Gjilanit, ku po merr trajtim mjekësor.
Lajmin e ka konfirmuar për Kallxo.com ushtruesi i detyrës së drejtorit të Spitalit të Gjilanit, Afrim Cana, i cili tha se Sheholli është pranuar më 11 tetor pas disa ndryshimeve në gjendjen shëndetësore.
“Pacienti është pranu dje (11.10.2025), ka ardhë me disa ndryshime në shëndet. Pas kontrolleve që i ka bërë në emergjencën e Gjilanit, ai është i hospitalizuar në Spitalin Rajonal të Gjilanit ku edhe është duke u trajtuar,” – tha Cana.
Ndërkohë, Gjykata Themelore e Prishtinës ende nuk është deklaruar lidhur me zhvillimet e fundit në këtë rast.
Më 10 tetor 2025, Gjykata kishte caktuar masën e paraburgimit prej një muaji ndaj Shehollit, pas kërkesës së Prokurorisë, duke vlerësuar se ekziston rrezik i ikjes dhe mundësi që i dyshuari të shmanget procedurës penale.
“Gjykata vlerësoi se masa e paraburgimit është adekuate, pasi ekziston rreziku që i pandehuri të ikë dhe të jetë i pakapshëm për organet e drejtësisë, duke qenë se dyshohet për një vepër penale të rrezikshmërisë së lartë – përkatësisht për veprën e spiunazhit,” thuhej në njoftimin e datës 10 tetor 2025.
Fatmir Sheholli u arrestua më 9 tetor 2025 nën dyshimet për spiunazh.
