13 tetor 2025, ora 13:07 – Presidentja e Komisionit Europian, Ursula von der Leyen, ka vlerësuar progresin e Shqipërisë drejt integrimit në Bashkimin Europian, duke e cilësuar si “të jashtëzakonshëm” dhe “me shpejtësi rekord”.
Në konferencën e përbashkët për media me kryeministrin Edi Rama në Tiranë, Von der Leyen tha se Brukseli do ta mbështesë Shqipërinë për të mbyllur negociatat e anëtarësimit brenda vitit 2027.
“Shqipëria është në rrugën e duhur për integrimin në Bashkimin Europian. Dua të theksoj që është një progres i mrekullueshëm, shpejtësi rekord. Qëllimi juaj është të mbyllni negociatat në vitin 2027 dhe ne do të jemi me ju në çdo hap të kësaj rruge,” – deklaroi Von der Leyen.
Ajo shtoi se momentumi gjeopolitik aktual është vendimtar për zgjerimin e BE-së:
“Agresioni i Rusisë kundër Ukrainës ka riformësuar kontinentin tonë dhe çdo vend europian duhet të zgjedhë vendin e tij. Shqipëria e ka bërë zgjedhjen e saj mjaft të qartë.”
Vizita e presidentes së Komisionit Europian në Tiranë vjen në kuadër të turit të saj në Ballkanin Perëndimor, ku do të diskutohet për përparimin e vendeve të rajonit në procesin e integrimit europian.
