Leposaviq, 15 Tetor 2025 – Një operacion i Policisë së Kosovës në fshatin Mekinice të Leposaviqit ka rezultuar me zbulimin dhe konfiskimin e një sasie të konsiderueshme armësh dhe pajisjesh të tjera ilegale. Rasti është raportuar fillimisht nga një grua, e cila ka deklaruar se është kanosur nga bashkëshorti i saj, i cili posedonte armë zjarri.
Gjatë kontrollit në shtëpinë e të dyshuarit S.T. (49 vjeç), janë sekuestruar:
-
3 pushkë automatike AK-47
-
1 pushkë ajrore
-
1 revole
-
1 armë e vogël në formë revolje
-
55 fishekë
-
1 bajonetë, 2 thika
-
6 karikatorë dhe pajisje të tjera
-
Uniforma ushtarake dhe të policisë së Serbisë
Sipas Policisë, ndaj S.T. ekzistonte një urdhër mbrojtës aktiv, ndërsa ai është arrestuar dhe ndaluar për 48 orë. Prokuroria ka inicuar rastet për “Kanosje”, “Mospërfillje të urdhrit të gjykatës” dhe “Mbajtje të paautorizuar të armëve”.
Gjithashtu, babai i të dyshuarit, N.T. (70 vjeç), ka marrë përgjegjësinë për një pjesë të armëve dhe uniformave. Ndaj tij është iniciuar procedurë në liri për “Mbajtje të paautorizuar të armëve”.
Policia Rajonale në Mitrovicë Veri thekson përkushtimin për garantimin e sigurisë publike dhe fton qytetarët të raportojnë çdo aktivitet të dyshimtë.
