Vushtrri, 20 tetor 2025 – Pa miratimin e Kryesisë së Lidhjes Demokratike të Kosovës (LDK), kandidati i kësaj partie për kryetar të komunës së Vushtrrisë, Xhafer Tahiri, ka nënshkruar sot marrëveshje koalicioni me Lëvizjen Vetëvendosje (LVV) për raundin e dytë të zgjedhjeve lokale.
Ceremonia e nënshkrimit është mbajtur në qendër të Vushtrrisë, ku marrëveshja është firmosur nga Tahiri dhe kandidati i LVV-së, Sylejman Meholli.
Në ngjarje ka marrë pjesë edhe kryetari i Vetëvendosjes, Albin Kurti.
Sipas burimeve të mediumit Paparaci, Tahiri – i cili doli i treti në raundin e parë të zgjedhjeve – ka vepruar pa koordinim me organet qendrore të partisë. Marrëveshja e tij me LVV-në është cilësuar si veprim i njëanshëm dhe në kundërshtim me vendimet e Kryesisë së LDK-së.
Në një komunikim zyrtar të Sekretariatit të LDK-së, dërguar sot kryetarëve të degëve, është theksuar se partia nuk ka dhënë autorizim për asnjë koalicion para certifikimit të rezultateve.
“Ju rikujtojmë se Kryesia Qendrore e Lidhjes Demokratike të Kosovës nuk ka autorizuar dhe nuk autorizon asnjë koalicion para certifikimit të rezultateve zgjedhore. Çdo veprim individual do të trajtohet në organet më të larta partiake, sipas Statutit të Lidhjes Demokratike të Kosovës,” thuhet në mesazhin që Gentiana Azemi, zyrtare për komunikim në LDK, ua ka dërguar kryetarëve të degëve.
LDK deri tani nuk ka dalë me një reagim publik lidhur me këtë zhvillim, ndërsa pritet që çështja të trajtohet në organet drejtuese të partisë.
