Rusia ka refuzuar propozimin e mbështetur nga presidenti amerikan Donald Trump për ngrirjen e konfliktit në Ukrainë përgjatë vijave aktuale të frontit. Ky qëndrim u konfirmua sot nga zëdhënësi i Kremlinit, Dmitry Peskov, duke theksuar se pozicioni negociues i Moskës “mbetet i pandryshuar”.
Propozimi erdhi pas takimit të presidentit ukrainas Volodymyr Zelensky me Donald Trump, ku lideri amerikan pranoi të mbështeste idenë që lufta të ndalej pa ndryshime territoriale, duke u ngrirë në vijën ekzistuese të kontaktit.
Megjithatë, Kremlini e ka hedhur poshtë këtë qasje, duke sinjalizuar se presidenti Vladimir Putin mbetet i përkushtuar ndaj qëndrimit të tij maksimalist për konfliktin dhe kërkesave territoriale të Rusisë.
Kur u pyet për detajet e diskutimeve të fundit telefonike mes Putin dhe Trump, Peskov refuzoi të jepte informacion shtesë. Ai konfirmoi megjithatë se Budapesti është zgjedhur si vend për një samit të mundshëm midis dy liderëve, duke theksuar rolin ndërmjetësues të kryeministrit hungarez Viktor Orban.
“Orban ka marrëdhënie mjaft të ngrohta me presidentin Trump dhe marrëdhënie shumë konstruktive me presidentin Putin. Kjo kontribuoi në mirëkuptimin që u arrit gjatë telefonatës së fundit”, deklaroi Peskov.
Refuzimi rus ndaj planit të ri nënkupton se përpjekjet diplomatike për t’i dhënë fund luftës mbeten të bllokuara, ndërsa vijat e frontit në Ukrainë vazhdojnë të jenë arenë përplasjeje të ashpër.
