Një ngjarje tragjike me përmasa politike ka tronditur opinionin publik në Shtetet e Bashkuara. Regina Aviles, 35-vjeçare, ndihmëse e një kongresmeni republikan nga Teksasi, ka ndërruar jetë pasi i vuri flakën vetes në oborrin e shtëpisë së saj, mes dyshimeve për një lidhje jashtëmartesore me shefin e saj, kongresmenin Tony Gonzales.
Aviles, e cila ishte nënë e një djali tetëvjeçar, u vetëdogj më 13 shtator në qytetin e Uvalde. Ajo u dërgua me urgjencë në spital, por nuk arriti t’u mbijetojë plagëve dhe vdiq një ditë më vonë.
Sipas burimeve të “Daily Mail”, Aviles kishte filluar një lidhje romantike me Gonzalesin, 43-vjeçar, i cili është i martuar dhe baba i gjashtë fëmijëve. Ajo kishte shërbyer si drejtoreshë rajonale në stafin e tij që nga viti 2021 dhe ishte një figurë aktive në komunitetin e Uvalde, shpesh e pranishme në takimet publike të kongresmenit.
Policia e Uvalde konfirmoi se incidenti është regjistruar nga kamerat e sigurisë në shtëpinë e viktimës, ndërsa pamjet janë dërguar për ekspertizë në laboratorin kriminalistik të Departamentit të Sigurisë Publike të Teksasit.
Megjithatë, autoritetet kanë refuzuar të publikojnë raportet policore, thirrjen në 911 dhe videot e ngjarjes, duke kërkuar që materialet të mbahen të mbyllura nga Prokuroria e Përgjithshme e shtetit — një vendim që ka ngritur dyshime për ndikim politik dhe mbrojtje ndaj Gonzalesit.
Zyra e kongresmenit nuk ka pranuar as të konfirmojë e as të mohojë raportimet për lidhjen, pavarësisht kërkesave të shumta të mediave amerikane.
Burime pranë familjes së viktimës thonë se bashkëshorti i saj, Adrian Aviles, kishte zbuluar lidhjen disa muaj para vdekjes, gjë që kishte çuar në ndarjen e çiftit, megjithëse ata kishin ruajtur kujdesin e përbashkët për djalin e tyre.
Ngjarja ka shkaktuar reagime të shumta në opinionin publik amerikan, me thirrje për hetim transparent dhe pa ndikim politik.
/Qendra.info/
