Prishtinë, 22 Tetor 2025 – Kandidati i Lëvizjes Vetëvendosje për kryetar të Fushë Kosovës, Valon Prebreza, është parë në një takim me kandidatin e Partisë Demokratike të Kosovës, Rrahim Tërnavën, duke ngritur pikëpyetje mbi mundësinë e koalicioneve lokale para balotazhit të 9 nëntorit.
Sipas pamjeve të siguruara nga Infokus, takimi është zhvilluar të martën në lokalin “Such Caffe”, në qendrën tregtare Royal në rrugën B të Prishtinës.
Prebreza, i cili në zgjedhjet e 12 tetorit doli i pari me 45.15% të votave, po zhvillon një sërë takimesh me përfaqësues të partive të tjera. Vetëm një ditë më parë, ai ishte takuar edhe me kandidaten e AAK-së, Vildane Latifi, e cila kishte përfunduar e katërta me 1.20% të votave.
Në dallim nga takimi me Latifin, që u publikua në rrjetet sociale, takimi me Tërnavën nuk u bë publik nga ana e Prebrezës. Megjithatë, kandidati i Vetëvendosjes kishte konfirmuar për media se “do të zhvillonte një takim me kandidatin e PDK-së”, çka tregon se bisedimet ishin në zhvillim.
Zhvillimet e fundit tregojnë për një dinamikë të re politike në prag të balotazhit, ku partitë opozitare duket se po shqyrtojnë mundësitë e marrëveshjeve lokale me Vetëvendosjen, për të ndikuar në rezultatin përfundimtar në disa komuna kyçe.
