Prishtinë, 23 tetor 2025 – Analisti politik Agon Maliqi ka deklaruar se kryeministri në detyrë, Albin Kurti, dëshiron të qeverisë vetëm dhe nuk ka gatishmëri për të ndërtuar konsensus me partitë e tjera. Sipas tij, shembujt nga e kaluara i japin të drejtë opozitës të mos besojë në bashkëqeverisje me Kurtin.
Kurti është mandatar për qeverinë e re pas konstituimit të Kuvendit nga zgjedhjet e 9 shkurtit, por ende nuk ka arritur të sigurojë shumicën prej 61 votash. Vetëvendosje ka 48 deputetë dhe mbështetje nga disa deputetë të komunitetit joserb, por i nevojiten së paku edhe 5 të tjerë. Maliqi ka vlerësuar se hezitimi i Kurtit që nga shkurtit për të formuar qeverinë mund të çojë në zgjedhje të parakohshme, ndërsa përpjekjet e tij për të blerë kohë dhe për të përdorur favorizime elektorale, si ato për studentët, nuk ndryshojnë situatën.
Analisti shton se Kurti nuk ka kulturë të kompromisit dhe ka instrumentalizuar partnerët për përfitime personale në pushtet. Ai ka theksuar se refuzimi i partive opozitare për bashkëpunim vjen nga frika se Kurti mund t’i përdorë ato për të rritur ndikimin e tij, duke i shfrytëzuar për efekte elektorale. Maliqi vlerëson se në rast të dështimit të Kurtit për të formuar qeverinë, skenari më i mirë do të ishte një marrëveshje për qeveri teknike me pjesëmarrjen e opozitës për të kaluar ligjet e nevojshme dhe buxhetin, para zgjedhjeve të reja.
Ai gjithashtu shton se në rast të zgjedhjeve të reja, nuk ka arsye që vota për VV-në të rritet krahasuar me rezultatin prej 42% në shkurt, ndërsa çdo ndryshim i madh në Kuvend mund të vijë vetëm nga situata e AAK-së dhe Nismës që rrezikojnë pragun zgjedhor.
