Sopranoja shqiptare me famë botërore, Ermonela Jaho, ka njoftuar se do të mbajë një koncert të veçantë në Gjakovë më 15 nëntor, një ngjarje që ajo e cilësoi si dhuratë për popullin shqiptar të Kosovës.
Lajmin e bëri të ditur gjatë një lidhjeje live nga New Yorku për Euronews Albania.
Koncerti do të mbahet në skenën e Kaninës, me ftesë të Fondacionit për Gjakovën, dhe Jaho do të performojë së bashku me Orkestrën e Teatrit dhe Baletit, nën dirigjimin e një dirigjenti spanjoll.
Në këtë mbrëmje muzikore, sopranoja do të sjellë një repertor me këngë shqiptare dhe mesdhetare, duke u fokusuar në motivin e kthimit në vendlindje, nostalgjinë dhe lidhjen shpirtërore me atdheun.
“Muzika do të shoqërohet me histori shqiptare mbi largimin nga vendi, migrimin, pritjen dhe sakrificat e popullit shqiptar. Muzika na lidh të gjithëve, është gjuha e shpirtit. Nuk ka rëndësi ku performohet, por ku bashkon shqiptarët — dhe kjo është diçka e bukur që kemi nevojë sot,” tha Jaho.
Artistja e njohur shtoi se vizita në Gjakovë është veçanërisht e rëndësishme për të:
“Kur shkova në Gjakovë, sikur u kthye koha mbrapa. Gjithçka aty ishte xhenuine, 100% shqiptare, që ka ende shpresë edhe në kohën e globalizmit.”
Ermonela Jaho, e lindur në Shqipëri, u largua në vitin 1993 me një bursë studimi dhe që atëherë ka përfaqësuar denjësisht artin shqiptar në skenat më prestigjioze të botës.
