Bruksel, 31 tetor 2025 – Një raport i ri i Këshillit Evropian për Sigurinë e Transportit (ETSC) zbulon se rreth 25% e aksidenteve rrugore në Bashkimin Evropian lidhen me drejtimin e automjetit nën efektin e alkoolit.
Sipas raportit, rreth 6.500 jetë njerëzish mund të shpëtohen çdo vit nëse të gjithë drejtuesit e mjeteve do të respektonin ligjin dhe nuk do të udhëtonin pas konsumimit të alkoolit.
Europa mbetet rajoni me nivelin më të lartë të konsumit të alkoolit në botë, me një mesatare prej 9.2 litrash alkool të pastër për person në vit, por me dallime të mëdha midis shteteve.
🔹 Vendet me konsum më të ulët: Malta, Norvegjia dhe Suedia
🔹 Vendet me konsum më të lartë: Estonia, Çekia dhe Irlanda
Ekspertët theksojnë se alkooli ndikon në aftësitë motorike dhe njohëse të shoferit, edhe në doza që janë nën nivelin e lejuar në disa shtete të BE-së. Kjo e bën drejtimin e automjetit pas konsumimit të alkoolit një rrezik serioz për jetën.
Raporti nënvizon se edhe sasi të vogla alkooli mund të shkaktojnë reagime më të ngadalta, mungesë përqendrimi dhe vështirësi në vlerësimin e situatave në rrugë — faktorë që shumë shpesh çojnë në aksidente fatale.
