04 nëntor 2025 – Gjakovë / Prishtinë
Një zyrtar i Zyrës së Bashkimit Evropian në Kosovë është dërguar me urgjencë në QKUK, pasi ka marrë plagë të rënda nga një mjet i mprehtë, mëson ekskluzivisht Sinjali.
Ngjarja është evidentuar të martën, kur fillimisht i plagosuri është paraqitur në Urgjencën e QKMF-së në Gjakovë, e më pas është dërguar për trajtim në Spitalin Rajonal “Isa Grezda”. Për shkak të gjendjes së rëndë shëndetësore, ai është transferuar menjëherë në Qendrën Klinike Universitare të Kosovës në Prishtinë.
Personi i plagosur është identifikuar si Stefan Ilianov Sheynov, rreth 49 vjeç, zyrtar i Zyrës së Bashkimit Evropian, i cili gëzon imunitet diplomatik. Sipas raportimeve fillestare mjekësore, ai ka marrë dy plagë shpuese, një në qafë dhe një në gjoks.
Për momentin, ende nuk dihen vendndodhja e saktë e ngjarjes, rrethanat dhe personi i dyshuar. Sheynov, për shkak të gjendjes së tij, nuk ka mundur të japë deklaratë për hetuesit.
Në rast janë përfshirë njësitë hetimore të Drejtorisë Rajonale të Policisë në Gjakovë, ndërsa me urdhër të Prokurorit të Krimeve të Rënda, rasti është cilësuar fillimisht si:
“Vrasje në tentativë”.
Hetimet po vazhdojnë.
