Agjencia e Sigurisë dhe Informacionit e Serbisë (BIA) ka ndërmarrë një operacion të gjerë në rajonin e Raškës, ku janë arrestuar disa persona nën dyshimin se kanë mbledhur dhe dërguar informacione të ndjeshme drejt shërbimeve inteligjente të Kosovës.
Sipas mediave serbe, hetimet kanë zgjatur për disa muaj dhe janë zhvilluar në fshehtësi të plotë, ndërsa aksioni i arrestimeve është kryer njëkohësisht në disa lokacione për të parandaluar mundësinë e arratisjes së të dyshuarve.
Burime brenda institucioneve të sigurisë kanë deklaruar se të arrestuarit dyshohet se kanë pasur qasje në të dhëna të rëndësishme që lidhen me strukturat shtetërore dhe veprimtarinë e sigurisë në Serbi. Po ashtu, hetuesit po verifikojnë nëse të dyshuarit kanë pasur lidhje të drejtpërdrejta me persona zyrtarë në territorin e Kosovës.
Numri i saktë i personave të arrestuar ende nuk është bërë publik, ndërsa BIA nuk ka dhënë një deklaratë zyrtare mbi rastin. Megjithatë, burime të afërta me hetimin pohojnë se ky operacion është pjesë e një fushate më të gjerë kundër aktiviteteve të spiunazhit në rajon.
Qendra.info do të vijojë të ndjekë zhvillimet dhe do t’ju informojë me detaje të reja sapo ato të bëhen të ditura.
