Mitrovicë, 10 nëntor 2025 – Nënkryetari i Partisë Demokratike të Kosovës (PDK), Bedri Hamza, ka reaguar pas përfundimit të zgjedhjeve në Mitrovicë, duke falënderuar qytetarët për mbështetjen ndaj kandidatit të kësaj partie për kryetar, Arian Tahiri.
Hamza ka theksuar se PDK ka dalë partia e parë në Mitrovicë, si për nga numri i votave ashtu edhe për nga numri i asamblistëve.
“Ju falënderoj që na mbështetët dhe besuat në kandidatin tonë. Falënderoj gjithashtu secilin aktivist të PDK-së që kontribuoi në këtë fushatë të bukur dhe të respektueshme. Edhe pse nuk e arritëm rezultatin e dëshiruar në garën për kryetar, e vlerësoj lartë ekipin për punën dhe përkushtimin e treguar. PDK-ja ka dalë partia e parë me numër të votave dhe me numër të asamblistëve në Mitrovicë”, ka deklaruar Hamza.
Ai shtoi se kandidati i PDK-së, Arian Tahiri, ka treguar integritet dhe vlera të larta në këtë proces.
“Ariani ka dëshmuar se integriteti, kultura dhe përkushtimi janë themeli i politikës së ndershme”, tha Hamza.
Sipas rezultateve të deritanishme, PDK pritet të ketë përfaqësimin më të madh në Asamblenë Komunale të Mitrovicës.
