Hagë, 10 nëntor 2025 – Diplomati i njohur amerikan, Christopher Hill, ka dalë sot para trupit gjykues në Dhomat e Specializuara të Kosovës në Hagë, si dëshmitar në procesin gjyqësor ndaj ish-krerëve të Ushtrisë Çlirimtare të Kosovës (UÇK) – Hashim Thaçi, Kadri Veseli, Rexhep Selimi dhe Jakup Krasniqi.
Hill, i cili mban kodin 1DW-008, është dëshmitari i pestë i thirrur nga mbrojtja e Hashim Thaçit, që përfaqësohet nga avokati Luka Mishetiq, raporton Betimi për Drejtësi.
Paraprakisht, gjykata ka pranuar në listën e provave materiale një dokument të propozuar nga mbrojtja, që përfshin një pjesë të një videoje e cila do të përdoret gjatë dëshmisë së Hillit. Kjo kërkesë nuk është kundërshtuar nga Prokuroria Speciale.
Christopher Hill është një nga diplomatët më me përvojë të Shteteve të Bashkuara në Ballkan, i njohur për angazhimin e tij në proceset e paqes gjatë dhe pas luftërave në ish-Jugosllavi.
