Diplomati amerikan, Christopher Hill, tha gjatë dëshmisë së tij në Gjykatën Speciale se tensionimi i situatës në Kosovë u përshpejtua pas deklaratës së Robert Gelbard, ish-emisar i SHBA-ve për Ballkanin, i cili e kishte quajtur UÇK-në “organizatë terroriste”.
Hill tregoi se deklarata e Gelbard-it u mbështet “në përvojat e tij të mëparshme” me grupe të armatosura në Amerikën Latine. Sipas Hill-it, kjo deklaratë u kuptua si sinjal për Beogradin që të ashpërsonte veprimet ndaj shqiptarëve të Kosovës.
“Disa menduan se ai u dha serbëve dritë jeshile. Duhet të them se nuk ka prova konkrete për këtë, por këtë e kemi dëgjuar të thuhet shpesh. Nëse i dërguari amerikan e quan UÇK-në terroriste, këtë mund ta interpretojnë si sinjal për të vepruar kundër tyre,” tha Hill.
Ai theksoi se menjëherë pas kësaj ndodhi sulmi i forcave serbe ndaj familjes Jashari në Prekaz, ku u vranë pothuajse të gjithë anëtarët e familjes.
Më vonë, sipas Hill-it, Gelbard e ndryshoi qëndrimin dhe pati një përplasje verbale të ashpër me Sllobodan Millosheviqin, me ç’rast Millosheviqi kishte refuzuar ta takonte sërish.
“E gjithë kjo filloi me komentet e tij dhe përfundoi me sulmin ndaj familjes Jashari,” u shpreh Hill.
