Diplomati i njohur amerikan, Christopher Hill, ka dëshmuar sot në Dhomat e Specializuara në Hagë, ku foli rreth rolit të tij dhe takimeve me ish-udhëheqësin politik të UÇK-së, Hashim Thaçin, gjatë Konferencës së Rambujesë në vitin 1999.
Hill tregoi se në atë periudhë, Shtetet e Bashkuara të Amerikës kishin paraqitur një propozim politik që synonte arritjen e një marrëveshjeje mes palëve, por se Thaçi nuk e kishte pranuar, për shkak se dokumenti nuk përmendte qartë pavarësinë e Kosovës.
“Ai shfaqi simpati për atë që po bënim, e kuptoi argumentin tonë se nuk mund të jepet një propozim vetëm për njërën palë. Por shqetësimi i tij ishte që nuk ishte në pozitë të pranonte një propozim që nuk përfshinte fjalën ‘pavarësi’ në dokument me terma të qartë,” – deklaroi Hill.
Diplomati amerikan shtoi se Thaçi e kishte kuptuar logjikën diplomatike të SHBA-së, por realiteti politik i asaj kohe e pengonte të bënte lëshime që mund të interpretoheshin si heqje dorë nga aspirata për pavarësi.
“Në atë kohë, çdo dokument që nuk përmendte pavarësinë shihej si kompromis i tepërt. Thaçi nuk mund ta pranonte një gjë të tillë, pasi përfaqësonte njerëzit që kërkonin liri të plotë,” – tha Hill.
Dëshmia e Hill-it hedh dritë mbi dinamikat komplekse të negociatave të Rambujesë, ku pala shqiptare përballej me presionin ndërkombëtar për kompromis dhe me pritjet e popullit për pavarësi të menjëhershme.
Kjo dëshmi është pjesë e procesit gjyqësor kundër ish-krerëve të Ushtrisë Çlirimtare të Kosovës, që po zhvillohet në Hagë, ku Thaçi dhe të tjerët po akuzohen për krime lufte dhe krime kundër njerëzimit.
