Ish-ambasadori amerikan, Christopher Hill, ka vazhduar dëshminë e tij në Gjykatën Speciale të Hagës si dëshmitar i mbrojtjes në rastin ndaj ish-presidentit të Kosovës, Hashim Thaçi. Gjatë seancës së së premtes, avokati mbrojtës i Thaçit, Luka Misetic, përmbylli pyetjet e tij duke kërkuar nga Hill të sqarojë arsyen pse ai pranoi të përfshihet në këtë proces gjyqësor.
Hill deklaroi se kishte mësuar që Thaçi po mbahej i burgosur, dhe se pas kontaktimit nga palët, e ndjeu si detyrim të paraqitej për të thënë atë që ai vetë ka njohur nga periudha e luftës dhe e procesit të paqes.
“Koha nuk i shëron të gjitha plagët. Por pas 25 vitesh, është e rëndësishme të rikujtohen ngjarjet. Nuk kam arsye të besoj se z. Thaçi ka qenë i përfshirë në aktivitete të paligjshme. Nuk kam dëgjuar në atë kohë që ai të ketë urdhëruar apo kryer veprime të tilla,” tha Hill.
Ai shtoi se nuk ka kërkuar këshilla nga askush para se të pranonte të dëshmonte, por se personat përkatës e kontaktuan atë dhe ai vendosi të paraqitet “për të thënë atë që di”.
Pas përfundimit të pyetjeve nga avokati Misetic, seanca ka vijuar me pyetjet e avokatit të Jakup Krasniqit.
