Deputetja e Lëvizjes Vetëvendosje, Adriana Matoshi, ka reaguar pas zhvillimeve të fundit rreth procesit zgjedhor në Mitrovicë. Në një postim në rrjetet sociale, ajo ka bërë një krahasim të rëndë, duke pretenduar se Mitrovica ishte synuar të merrej nga presidenti serb Aleksandar Vuçiq, Milan Radojiçiq dhe, siç është shprehur ajo, “mahalla e Lushtakëve”.
Matoshi ka akuzuar kundërshtarët politikë se, sipas saj, kanë tentuar të ndikojnë në rezultatin zgjedhor përmes exit-polleve dhe më pas duke përfshirë organet e drejtësisë.
“U mundun me vjedh Mitrovicën me exit-polla 2 herë, por dështun keq! Pas dështimit me exit-polla, e paskan aktivizu prokurorinë,” ka shkruar ajo.
Ajo shtoi se Mitrovica nuk mund të merret nga askush “as nga Vuçiqi, as nga Radojiçiqi, e as nga ju”, duke theksuar se Vetëvendosje, sipas saj, do të mbrojë rezultatin zgjedhor.
Sipas Matoshit, ashtu siç, sipas saj, është “pastruar Veriu” nën qeverisjen aktuale, “kismet” do të ndodhë edhe në pjesën e Jugut.
Në fund, ajo ka uruar kandidatin e Vetëvendosjes, Faton Peci.
Deklarata e deputetes ka shkaktuar reagime të ndryshme në opinion, duke sjellë debat për gjuhën e përdorur dhe krahasimet politike.
