Kryetari i AAK-së, Ramush Haradinaj, pas takimit me Presidenten Vjosa Osmani, ka kritikuar vendimin për të mbajtur zgjedhjet parlamentare më 28 dhjetor, duke e quajtur këtë datë si një “arrogancë politike” dhe ofendim ndaj qytetarëve.
Haradinaj theksoi se 21 dhjetori është data më e përshtatshme për mbajtjen e zgjedhjeve, pasi Kosova ka humbur shumë kohë dhe ka akumulime të temave buxhetore që kërkojnë zgjidhje sa më parë.
“Duke qenë se i është humbur shumë kohë Kosovës dhe ka akumulime të temave buxhetore, me respekt për qytetarët, kemi propozuar që 21 dhjetor të jetë dita e zgjedhjeve parlamentare. Në këtë mënyrë do të fitojmë të paktën një javë për vazhdimet buxhetore që duhet të ndodhin,” deklaroi Haradinaj.
Ai shtoi se propozimi i VV-së për 28 dhjetor përbën një përbuzje ndaj qytetarëve dhe është i papërshtatshëm, duke u zhvilluar gjatë periudhës së pushimeve dimërore dhe madje me numërimin e rezultateve gjatë Natës së Vitit të Ri. Megjithatë, Haradinaj konfirmoi se AAK-ja është e gatshme të marrë pjesë në zgjedhje, pavarësisht datës.
