Kryetari i PDK-së, Bedri Hamza, ka njoftuar për marrëveshje koalicioni para dhe pas zgjedhor me Eman Rrahmanin e Listës për Familjen.
Partia Demokratike e Kosovës e ka zyrtarizuar të mërkurën koalicionin me Eman Rrahmanin që në zgjedhjet e kaluara i priu Listës për Familjen.
Në një konferencë për media, kryetari i PDK-së, Bedri Hamza ka thënë se bëhet fjalë për marrëveshje që ka synim “ndryshimin e gjendjes në Kosovë”.
Ai e ka cilësuar praninë e anëtarëve të Listës për Familjen në listën e PDK-së për zgjedhjet e 28 dhjetorit si “vlerë të shtuar”.
“Qëllimi i këtij koalicioni është në drejtim të asaj që të bëjmë progres dhe të ndryshojmë gjendjen në vend. Jam i bindur që ky është një koalicion i qëndrueshëm”, ka thënë Hamza.
‘’Bashkë me z. Eman Rrahmani dhe anëtarët e tjerë të Listës Familja kemi bërë marrëveshje për koalicion para dhe paszgjedhor’’, tha Hamza në një konferencë të përbashkët për media.
Hamza tha se qëllimi i kësaj marrëveshje është “t’i bashkojmë forcat në funksion të asaj që të bëjmë progres dhe ta ndryshojmë gjendjen në vend, duke përfshirë ekonominë, drejtësinë, arsimin, shëndetësinë, energjinë, sigurinë dhe normalisht duke pasë kujdes edhe për mirëqenien dhe familjen”.
“Unë jam i bindur se ky është një koalicion i qëndrueshëm dhe bashkërisht ne do të kemi sukses”.
E Rrahmani ka thënë se ka negociuar edhe me Lidhjen Demokratike të Kosovës, por ka shtuar se në këto zgjedhje kanë vendosur të arrijnë marrëveshje me PDK-në.
“Kemi diskutuar çështjen e zhvillimit, situatës me energjinë, aspektin social dhe shoqërinë dhe familjen në përgjithësi. Kemi arritur dakordim të plotë në të gjitha pikat dhe jemi dakorduar e zotuar për një angazhim të përbashkët në ngritjen e mirëqenies, në ruajtjen e familjes dhe dinjitetit tonë, por edhe punët që e presin vendin tonë”, ka thënë Rrahmani.
Koalicioni për Familjen pati garuar për herë të parë në zgjedhjet e 9 shkurtit. Ky koalicion i disa subjekteve nuk e pati kaluar pragun. Pati marrë 2.13 për qind të votave ose 20 mijë e 23 vota.
