Faruk Nura, kandidat për deputet nga Lidhja Demokratike e Kosovës, ka prezantuar platformën e tij zgjedhore me të cilën garon në listën e LDK-së me numrin 74. Ai ka vënë theksin në forcimin e institucioneve, rritjen e besimit qytetar dhe nxitjen e zhvillimit ekonomik si boshtet kryesore të programit të tij politik.
Në prezantimin e tij, Nura u shpreh se përballja me sfidat aktuale kërkon qasje të matur dhe politika të qëndrueshme, të mbështetura në përvojë dhe profesionalizëm. Sipas tij, LDK-ja ofron bazën më të fortë për stabilitet institucional dhe përparim ekonomik.
“Është e domosdoshme të rikthehet funksionaliteti i plotë i institucioneve dhe të krijohen kushte që u japin qytetarëve siguri dhe perspektivë,” deklaroi Nura, duke nënvizuar se prioritetet e tij përfshijnë zhvillimin lokal, investimet në ekonomi dhe mbështetjen e sektorëve kyç për rritje afatgjatë.
Faruk Nura synon të sjellë në Kuvend një qasje të orientuar drejt dialogut, profesionalizmit dhe transparencës, duke theksuar se vendi ka nevojë për vendimmarrje të përgjegjshme dhe plane konkrete zhvillimore.
