11 dhjetor – Kryeministri në detyrë i Kosovës, Albin Kurti, ka komentuar shkurt deklaratën e Ambasadës Amerikane dhe reagimet e shoqërisë civile pas vendimit të Komisionit Qendror të Zgjedhjeve për të mos certifikuar kandidatët e Listës Serbe për zgjedhjet e ardhshme.
Ambasada Amerikane kishte vlerësuar se “përpjekjet e VV-së për të bllokuar certifikimin e Listës Serbe janë dritëshkurtra dhe përçarëse”. E pyetur për këtë, Kurti tha se çështja nuk i takon atij por institucioneve përkatëse.
“Ajo është çështje e Ambasadës Amerikane, është çështje e KQZ-së. Unë jam kryeministër i Republikës së Kosovës”, deklaroi Kurti gjatë ceremonisë së vendosjes së gurthemelit të stadiumit në Podujevë.
Ndërkohë, Demokracia në Veprim (DnV) ka shprehur shqetësimin e saj për vendimin e KQZ-së, duke theksuar se nuk është hera e parë që ky institucion largohet nga praktikat e mëparshme dhe vendimet e PZAP-së e Gjykatës Supreme.
Kjo çështje vazhdon të ngjallë reagime, teksa pritet që institucionet kompetente të sqarojnë hapat e mëtejshëm në procesin zgjedhor.
