Lëvizja Vetëvendosje ka reaguar pas rezultateve të zgjedhjeve të 28 dhjetorit, duke e cilësuar fitoren e saj si plebishitare dhe si reflektim të qartë të vullnetit politik të qytetarëve.
Në komunikatën për media, LVV thekson se së bashku me partnerët e saj kanë dalë të parët në 24 komuna të Republikës së Kosovës dhe se në çdo komunë kanë shënuar rritje të votave krahasuar me zgjedhjet e 9 shkurtit.
“Vullneti politik i qytetarëve është i qartë, fitorja elektorale është plebishitare, referendumi demokratik kaloi,” thuhet në reagim.
Lëvizja gjithashtu ka përmendur rezultatet pozitive nga vota e diasporës, të cilat i ka konsideruar si një fitore të jashtëzakonshme dhe shenjë të mbështetjes së gjerë që ka marrë.
“Fitore e jashtëzakonshme po shënohet edhe në votën nga mërgata,” ka deklaruar LVV.
Në përfundim, Lëvizja Vetëvendosje falënderon qytetarët për mbështetjen dhe i uron për fitore historike në këto zgjedhje.
