Prishtinë — Kryetari i Komunës së Mitrovicës dhe njëherësh kryetar i partisë Guxo, Faton Peci, ka deklaruar se kjo parti do të udhëheqë dy ministri në qeverinë e ardhshme “Kurti 3”.
Peci ka bërë të ditur se Donika Gërvalla do të jetë Zëvendëskryeministre dhe Ministre e Drejtësisë, duke theksuar se emri i saj është i pakontestueshëm në përbërjen e kabinetit të ri qeveritar. Ai shtoi se, përveç Ministrisë së Drejtësisë, Guxo pritet të marrë edhe një ministri tjetër, megjithëse ende nuk është vendosur se cila do të jetë ajo.
“Ne e kemi njëfarë dakordimi në parim. Në prezentimin e kabinetit të ri, Kurti 3, emër i pakontestueshëm është Donika Gërvalla si Zëvendëskryeministre dhe Ministre e Drejtësisë. Minimalisht do ta kemi edhe një ministri tjetër”, u shpreh Peci.
Ai rikujtoi se Gërvalla ishte e paraparë për këtë pozitë edhe në dy qeveritë e mëhershme që nuk arritën të votoheshin në Kuvend, me mandatarë Albin Kurtin dhe Glauk Konjufcën.
Kryetari i Guxo bëri të ditur po ashtu se kjo parti do t’i ketë tetë deputetë në përbërjen e re parlamentare. Duke u kthyer në zhvillimet e vitit 2021, Peci tha se atëkohë nga kampi i Lëvizjes Vetëvendosje nuk kishte gatishmëri që Guxo t’i udhëhiqte dy ministri.
“Arsyeja pse më 2021 Guxo e ka marrë ministrinë e dytë, ka qenë emri im. Ka pasur pakënaqësi nga një eksponent i VV-së që në moment të fundit nuk u bë ministër, gjë që e kam kuptuar pas rreth dy vitesh. Por unë s’kam qenë as fajtor e as shkaktar i kësaj”, deklaroi Peci në një intervistë për Klan Kosova.
