Prizreni sot ka qenë cak i një aksioni të madh të Prokurorisë Themelore në këtë qytet. Mbi 100 komisionerë janë intervistuar, sit ë dyshuar për manipulimin me mbi 68 mijë votave. Kryeprokurori i Prizrenit, Petrit Kryeziu, theksoi se intervistimit nuk do t’i shpëtojnë as kandidatët të cilëve iu hoqën votat pas rinumërimit.
Vetëm një vendvotim, ka arritur ta ruajë në tërësi vullnetin e sovranit.
Të gjitha vendvotimet e tjera në komunën e Prizrenit në zgjedhjet e 28 dhjetorit, rezulton se janë manipuluar.
Si rezultat, një aksion i madh u realizua nga Prokuroria Themelore në Prizren, ku cak ishin komisionerët e kryesuesit e qendrave të votimeve.
Mbi 100 persona iu drejtuan stacionit policor në këtë qytet, të cilët hetuesia i kishte thirrur për intervistim.
E gjashtë të tjerë janë liruar në procedurë të rregullt, kurse disa të tjerë janë në kërkim pasi nuk u paraqitën të premten tek organet e rendit.
Kryeprokurori i Prokurorisë Themelore në Prizren, dha detaje për numrin e votave të manipuluara.
Personat e ndaluar, sipas prokurorisë dyshohen për disa lloje të veprave penale.
Njëri prej të dyshuarve, ka bashkëpunuar me Prokurorinë duke sinjalizuar edhe veprën penale të dhënies dhe marrjes së ryshfetit.
Kryeziu nuk përjashtoi mundësinë që për intervistim të thirren edhe kandidatët për deputetë që kanë vota të falsifikuara.
Madje, mes tyre dhe komisionerëve, po qe nevoja, Kryeziu tha se do të ketë një ballafaqim.
Përkundër gjithë kësaj, avokati i njërit prej të dyshuarve për falsifikim të votave, thotë se tash për tash mungon konkretizimi i dyshimeve të prokurorisë.
Ky aksion i Prokurorisë Themelore në Prizren u asistua edhe nga Policia e Kosovës, duke u cilësuar si një prej aksioneve më të mëdha.
Vetëm pak ditë më parë, koordinatorja nacionale për zgjedhje, prokurorja Laura Pula, ka kërkuar nga Prokuroritë Themelore të të gjitha komunave ku ka përfunduar procesi i rinumërimit të votave, që të grumbullojnë prova e informata, në lidhje me kryerjen e ndonjë vepre penale që ndërlidhet me procesin zgjedhor./teve1
