Edicion pas edicioni, duket se rregulli i famshëm i “100 ditëve” në “Big Brother VIP Albania” është kthyer thjesht në një formalitet!
Edhe ky sezon i pestë nuk do të bëjë përjashtim, pasi rrugëtimi i banorëve do të zgjasë përtej parashikimeve fillestare të formatit.
Deri më tani, kanë kaluar plot 82 ditë që nga nisja e spektaklit dhe numri i personazheve që vazhdojnë garën brenda shtëpisë mbetet tepër i lartë. Me 14 banorë ende aktivë në lojë, llogaritë janë të qarta: është e pamundur që formati të mbyllet brenda standardit të 100 ditëve.
Megjithëse produksioni nuk ka bërë ende një njoftim zyrtar (dhe zarfi i kuq nuk ka mbërritur ende në shtëpi), mediat bëjnë me dije se izolimi do të zgjatet sërish.
Thuhet se rrugëtimit të banorëve do t’i shtohen edhe rreth 30 ditë të tjera, duke e çuar sfidën e tyre në një tjetër nivel.
Po kur do të shpallet fituesi i këtij edicioni? Sipas zërave të fundit, finalja e madhe e BBVA 5 synohet të mbahet në fund të muajit të ardhshëm, konkretisht pas datës 20 Prill.
Mbetet për t’u parë se cili do të jetë vendimi përfundimtar i Vëllait të Madh.
