Në këtë operacion janë ndaluar pesë persona, në raste të ndryshme të ndërlidhura me një objekt banesor ku katër prej tyre dyshohen për kryerjen e veprës penale ‘’Blerja, posedimi, shpërndarja dhe shitja e paautorizuar e narkotikëve, substancave psikotrope ose analoge’’, sipas nenit 267 të KPRK-së, dhe një person për veprën penale ‘’Hyrja e paautorizuar kompjuterike’’, sipas nenit 277/D, dhe ‘’Mashtrimi Kompjuterik’’, nga neni 277/K sipas Ligjit Nr.08/L-188 për plotësimin dhe ndryshimin e Kodit Nr.06/L-074 Penal i Republikës së Kosovës.
Pas një pune intensive hetimore, dhe grumbullimit të informatave relevante lidhur me aktivitetet kriminale në fushën e shpërndarjes së narkotikëve, janë identifikuar katër persona të dyshuar për shpërndarje të substancave narkotike të dyshuar të llojit marihuanë dhe kokainë në Komunën e Prishtinës.
“Ndërkohë, Prokurori i shtetit në bashkëpunim të plotë me Policinë e Kosovës, ka realizuar bastisje në katër lokacione të ndryshme në Komunën e Prishtinës. Gjatë këtyre bastisjeve janë gjetur dhe sekuestruar: një paketim me substancë narkotike të dyshuar të llojit marihuanë me peshë totale 1.117.5 gramë, dhe dy paketime me substancë narkotike të dyshuar të llojit marihuanë 2.221 gramësh, para të gatshme në vlerë prej 4045 euro, 40 funta dhe 40 franga, dy (2) vetura, katër (4) telefona celularë, si dhe njëzetë e pesë (25) qese me substancë narkotike të dyshuar të llojit kokainë, me peshë totale prej 11.9 gramësh”, ka njoftuar Prokuroria.
Prokurori i shtetit ka njoftuar se brenda afatit ligjor, do të parashtrojë kërkesë për caktimin e ndonjë prej masave për sigurimin e pranisë së të pandehurve në procedurë penale.
“Prokuroria Themelore në Prishtinë, mbetet e përkushtuar në luftimin e kriminalitetit dhe do të vazhdojë ndërmarrjen e të gjitha veprimeve ligjore për zbardhjen e plotë të rastit”, thuhet në komunikatë.
