Kryetari i AAK-së dhe ish-komandanti i Zonës Operative të Dukagjinit, Ramush Haradinaj, ka përkujtuar dëshmorët e Betejës së Kosharës në manifestimin qendror për këtë ngjarje të vitit 1999.
Ai tha se pa këtë betejë, Marrëveshja e Kumanovës e 9 qershorit mund të kishte qenë më e pafavorshme.
“Pa luftën e Kosharës dhe intensitetin e sulmit, epilogu i luftës do të arrihej, por marrëveshja mund të ishte ndryshe, madje më e keqe”, u shpreh Haradinaj, duke nderuar sakrificën e dëshmorëve të Brigadës 138 “Agim Ramadani”.
Në këtë manifestim foli edhe ish-komandanti i Brigadës 123 të UÇK-së, Rrustem Berisha, i cili theksoi se suksesi në Koshare ishte rezultat i përgatitjeve të gjata, organizimit dhe vendosmërisë së luftëtarëve.
“Thyerja e kufirit nuk ishte rastësi, por fryt i përgatitjeve, guximit dhe një operacioni të mirëorganizuar ushtarak”, tha ai.
