Nga burgu në Hagë, ish-presidenti Hashim Thaçi ka dhënë një intervistë për gazetën prestigjioze gjermane “Frankfurter Allgemeine Zeitung”.
Në një përkthim jozyrtar të intervistës, Thaçi ka folur për procesin gjyqësor në Dhomat e Specializuara, të kaluarën e UÇK-së, ndërhyrjen e NATO-s në Kosovë, si dhe për zhvillimet politike në vend.
Duke iu përgjigjur pyetjeve të gazetarit gjerman, Thaçi ka shprehur dhimbjen për mungesën në varrimin e babait të tij, duke thënë se kjo është një plagë që do ta mbajë gjatë gjithë jetës.
Ai ka deklaruar se, ndonëse e konsideron të përfunduar garën politike, nuk e sheh të mbyllur jetën e tij politike, duke theksuar se do të vazhdojë t’i shërbejë vendit si qytetar i lirë në të ardhmen.
Lidhur me akuzat ndaj tij dhe bashkëluftëtarëve, Thaçi ka mbrojtur qëndrimet e ekipit të tij ligjor, duke theksuar se gjykimet ndërkombëtare kanë trajtuar më parë çështjet e luftës në Kosovë dhe se procesi aktual lidhet me pretendimet e raportit të Dick Marty-t.
Ai ka vlerësuar ndërhyrjen e NATO-s në vitin 1999 si vendimtare për lirinë e Kosovës dhe ka theksuar se lufta e UÇK-së ishte për mbijetesë dhe çlirim nga shtypja.
Duke folur për procesin e dialogut me Serbinë, Thaçi ka thënë se qëllimi i tij ka qenë gjithmonë paqja dhe njohja reciproke, në bashkëpunim me partnerët ndërkombëtarë.
Në fund, duke u pyetur për bashkëpunimin politik në Kosovë, ai ka deklaruar se “interesat e qytetarëve duhet të vendosen gjithmonë mbi interesat partiake”.
