Ndërsa afatet kushtetuese për zgjedhjen e presidentit po rrjedhin, kryeministri Albin Kurti tha se ende nuk ka rezultate konkrete për arritjen e një marrëveshjeje.
“Jemi në komunikim me kryetarët e partive opozitare; kur të ketë rezultate, atëherë ju njoftojmë”, tha Kurti.
Ndërsa kandidati për president nga LVV-ja, Glauk Konjufca, tha se nëse partitë opozitare nuk reflektojnë për marrëveshje, vendi shkon në zgjedhje.
“Të dy subjektet politike nuk kanë qenë të vullnetshme të propozojnë emra. LDK-ja më ka lënë përshtypjen se do të takohen jo vetëm njëherë”, deklaroi Konjufca.
Por, në opozitë thonë se kryeministri Kurti nuk po dëshiron të gjejë zgjidhje për çështjen e presidentit të ri. Deputeti i PDK-së, Kujtim Gashi, tha se Kurti po përdor një skenar për ta dërguar vendin në zgjedhje.
“I njëjti nuk ka as disponim, as vullnet, as energji për të qeverisur me Qeverinë e Kosovës. Kosova nuk ka pasur luks e as nevojë për të shkuar në zgjedhje, por zoti Kurti dhe subjekti i tij politik nuk po i japin drejtim kësaj çështjeje. Ne jemi të imponuar të përgatitemi si subjekt politik për të shkuar drejt zgjedhjeve”, tha Gashi.
Deputetja e AAK-së, Time Kadrijaj, tha se kryeministri Albin Kurti po dëshiron që, përmes takimeve me partitë politike opozitare, të imponojë zgjedhjen e presidentit të ri. Në një përgjigje për RTV21, deputetja Kadrijaj tha se Kurti synon të udhëheqë me tri institucionet qendrore.
“LVV-ja nuk po kërkon marrëveshje; ata po kërkojnë që opozita të qëndrojë në sallë për raundet e para, në mënyrë që të zgjidhet kandidati i mazhorancës. Kjo nuk është marrëveshje. Marrëveshje është kur partitë që po i fton zoti Kurti në takim t’u thotë: a keni një kandidat ose propozoni dy kandidatë? Kandidatët tuaj t’i kenë nënshkrimet tona, partive që po i fton, si PDK-së ose LDK-së, në mënyrë që t’ua japë pozitën e presidentit.”, tha Kadrija.
Nëse nuk ka një marrëveshje politike brenda afatit kushtetues, vendi shkon në zgjedhje.
