Në seancën gjyqësore për rastin e vrasjes së Liridona Ademaj, Prokuroria ka paraqitur fjalën përfundimtare, duke e cilësuar këtë krim si një nga më makabrit, të kryer me egërsi dhe dinakëri.
Sipas prokurores së rastit Javorka Perlinqeviq, vrasja e ndodhur më 29 nëntor 2023 është realizuar para syve të dy fëmijëve të mitur të viktimës, të cilët në atë kohë ishin vetëm 4 dhe 6 vjeç.
Prokuroria theksoi se ky fakt e rëndon edhe më shumë natyrën e krimit dhe pasojat e tij psikologjike.
“… sqaruar një krim makabër, vrasjen e Liridona Muresli Ademaj të kryer me datë 29.11.2023 para djemve të saj të mitur të cilët në kohën e kryerjes së veprës penale i kanë pasur 4 dhe 6 vjet. Nëse e keni dëgjuar mire po e cek vrasjen e Liridona Ademaj Murseli, edhe pse mediat gjatë raportimeve për këtë rast çdo herë raportojnë për të vrarën Liridona Ademaj. Por pyetemi se pse, pikërisht për shkak të egërsisë dhe mizorisë se treguar gjatë vrasjes së saj, si dhe për dinakërinë dhe qëndrimin pas vrasjes, të bashkëshortit të saj dhe njëkohësisht xhelatit, të akuzuarit të parë Naim Murselit.
Kjo procedurë gjyqësore ka qene e ndare ne tri faza, faza e parë fjala hyrëse dhe dëgjimi i dëshmitarëve të propozuar nga prokuroria ka treguar se i kanë përsëritur deklaratat që i kanë dhënë në procedurë hetimore, edhe në këtë fjalë përfundimtare do të fokusohemi në fakte qe janë të paraqitura nga ana e dëshmitarëve në rrethanat dhe faktet te cilat janë cekur në shqyrtimin gjyqësor e jo në procedurën paraprake veçanërisht në deklaratën e vëllaut të Liridonës, Leonardit i cili pas vrasjes rregullisht i viziton fëmijët e te vrarës Liridona dhe Naim Murseli… gjatë një vizite të fëmijëve ne Suedi djali më i madh në prani të psikologut ka thënë “hajni e futi dorën dhe i bëri mamit bam” gjithashtu Leonardi ka dëshmuar që fëmijët qartë e kanë sqaruar çështjen dhe nuk dëshirojnë të komunikojnë me babin e tyre me të akuzuarin Naimin dhe qe i refuzojnë të gjitha thirrjet telefonike të cilat i ka mundësuar qendra për pune sociale në Suedi për kontaktin në mes Naimit dhe fëmijëve të tij…” ka thënë në fjalën përfundimtare prokuroria
Prokurorja theksoi se gjatë procesit janë administruar prova materiale dhe janë dëgjuar të gjithë dëshmitarët, të cilët sipas saj kanë konfirmuar deklaratat e dhëna në fazën hetimore.
“Kjo procedurë gjyqësore ka qenë e ndarë në tri faza. Faza e parë fjala hyrëse dhe marrja në pyetje të dëshmitarëve të propozuar nga prokurori ka treguar se të gjithë dëshmitarët i kanë përsëritur deklaratat që i kanë dhënë në procedurën hetimore. Edhe në këtë fjalë përfundimtare do të fokusohemi në fakte që janë paraqitur nga dëshmitarët në rrethanat dhe faktet të cilat janë cekur në shqyrtimin gjyqësor e jo në procedurën paraprake”, tha ajo.
Ajo veçoi dëshminë e vëllait të viktimës, duke theksuar se deklarimet e tij dhe provat e tjera kanë ndihmuar në ndriçimin e rastit.
“Vëllau i Liridonës, Leonardi, i cili ka dëshmuar që gjatë një vizite të fëmijëve në Suedi djali më i madh në prani të psikologut ka thënë “hajni e futi dorën dhe i bëri mamit bam”, gjithashtu Leonardi ka dëshmuar që fëmijët qartë e kanë sqaruar çështjen dhe nuk dëshirojnë që të komunikojnë me babain e tyre dhe që i refuzojnë të gjitha thirrjet telefonike që i ka mundësuar qendra për punë sociale në Suedi. Gjatë dëshmisë Leonardi ka dëshmuar edhe faktin që fëmijët kanë dëgjuar për këtë se kur është vrarë Liridona Naimi e ka mbajtur Liridonën në njërin krah, gjë që ka vërtetuar edhe dëshmitari, eksperti i mjekësisë ligjore i cili e ka kryer autopsinë e trupit tani të ndjerës Liridona. Duke theksuar që anën e majtë të shpatullës ka pasur një hematomë që koha e përshtatet me kohën jo më tepër se një orë para kryerjes së vrasjes. E kur është pyetur a është e njëjta, ajo e nxirë a ka mundur të shkaktohej nga gishti i dorës ka deklaruar se ekziston kjo mundësi. Sa i përket dëshmitarëve të tjerë të gjithë i kanë përsëritur deklaratat e dhëna në procedurën paraprake”, tha ajo.
