Ish-eprori i UÇK-së, Uk Lushi, i ka bërë thirrje VV-së që të ndal gjuhen akuzuese që e çon vendin drejt vëllavrasjes.
Ai ka vlerësuar se VV i ka pushtetin dhe organet e sigurisë duhet të veprojnë për secilin njeri të dyshimtë.
Në profilin e tij në Facebook, Lushi ka kërkuar që të ndalen akuzat e shpifje pa evidencë.
“VV duhet ta ndalë gjuhën diskualifikuese dhe akuzuese ose e çon Kosovën në luftë vëllavrasëse. VV i ka pushtetin dhe organet e sigurisë dhe inteligjencës në dorë. Nëse dikush, qoftë edhe pjestar i UÇK-së, është njeri i Serbisë dhe (pu)shteti nuk e arreston, gjykon dhe pastaj mban në burg apo edhe e ekzekuton njeriun e Serbisë, kjo i bën pushtetin dhe VV-në njerëz të Serbisë. Nuk jeni veç ju njerëzit e VV-së shqiptarë. Jeni veç një parti dhe shihini edhe shqiptarët tjerë ashtu si janë— njerëz si ju që duan që shteti dhe kombi të jenë të tyrët aq sa të juajët. Ofroni bashkëpunim, e jo përçarje. Konkurrencë po, por jo sundim”, ka shkruar ai, duke kërkuar që të ndalen akuzat e shpifje pa evidencë.
“Nëse Kosova shkon në luftë civile për shkak të Albin Kurtit, Dejona Mihalit dhe VV-së do të jetë keq për secilin, por më së keqi për VV-në, Albin Kurtin dhe Dejona Mihalin. E keni shtetin në kontroll. Keni fakte dhe prova, arrestoni. Por mos u jargavitni duke hedhur propagandë musoliniane nga gojët sepse e keni tepruar”, ka shkruar ai.
